ԱՄՆ-ն նոր սահմանափակումներ է մտցրել Վենեսուելայի նավթի շուրջ

ԱՄՆ ֆինանսների նախարարությունը հրապարակել է նոր լիցենզիա, որը կարգավորում է Վենեսուելայի նավթային ոլորտում իրականացվող գործարքները և սահմանափակում է Ռուսաստանի մասնակցությունը այդ գործընթացներին։ Փաստաթուղթը հրապարակվել է Օտարերկրյա ակտիվների վերահսկման վարչության (OFAC) կողմից։

Լիցենզիան արգելում է ցանկացած գործարք, որտեղ ներգրավված են Ռուսաստանի, Իրանի, Հյուսիսային Կորեայի և Կուբայի քաղաքացիներ կամ ընկերություններ։ Սահմանափակումները տարածվում են նաև այն կազմակերպությունների վրա, որոնք ուղղակի կամ անուղղակի վերահսկվում են նշված երկրների կողմից կամ գործում են համատեղ ձեռնարկությունների ձևաչափով։

Բացի այդ, փաստաթուղթը սահմանափակում է գործարքները Վենեսուելայում և ԱՄՆ-ում գրանցված այն իրավաբանական անձանց հետ, որոնք պատկանում են կամ վերահսկվում են Չինաստանի կառույցների կողմից, ինչպես նաև համատեղ ձեռնարկությունների դեպքում, որտեղ ներգրավված են չինական ընկերություններ։

Միևնույն ժամանակ, լիցենզիան թույլատրում է ամերիկյան բիզնեսին գործունեություն ծավալել Վենեսուելայի նավթագազային ոլորտում՝ ներառյալ հետախուզումը, արդյունահանումը և հումքի մշակումը։