Փաշինյանը քննարկել է արհեստական բանականության գործարանի կառուցումը NVIDIA-ի փոխնախագահի հետ
Վարչապետ Նիկոլ Փաշինյանն ընդունել է NVIDIA ընկերության փոխնախագահ Ռև Լեբարեդյանին։ Հանդիպման ընթացքում քննարկվել են Firebird ընկերության կողմից Հայաստանում արհեստական բանականության գործարան և տվյալների կենտրոն կառուցելու նախագծի իրականացման ընթացքին վերաբերող հարցեր։ Ռև Լեբարեդյանը նշել է, որ տվյալ կենտրոնի կառուցման աշխատանքները ներկայումս ընթացքի մեջ են։ Այդ համատեքստում կողմերը կարևորել են NVIDIA ընկերության արտադրած գերհզոր չիպերի հերթական խմբաքանակի արտահանման թույլտվությունների տրամադրումը։
Զրուցակիցներն անդրադարձել են նաև Հայաստանում տեխնոլոգիական ոլորտի հետագա զարգացմանը, ինչպես նաև պետական կառավարման համակարգում արդյունավետությունը բարձրացնելու նպատակով արհեստական բանականության ներդրմանը վերաբերող հարցերին։ Այդ առումով վարչապետ Նիկոլ Փաշինյանը ընդգծել է մասնավոր հատվածի կողմից աջակցության տրամադրման անհրաժեշտությունը։
Ռև Լեբարեդյանը ներկայացրել է նաև Հայաստանում տեխնոլոգիաների ոլորտում կրթական ծրագրի իրականացման նախագիծը։ Վարչապետ Փաշինյանը ողջունել է ներկայացված գաղափարը և հայտնել Կառավարության աջակցությունն այն կյանքի կոչելու գործընթացում։
