Նոր փոփոխություն՝ բժշկական ծառայությունների համար․ էլեկտրոնային ՀԴՄ-ն կդառնա պարտադիր

Առաջարկվում է ՀՀ հարկային օրենսգրքի 380.1 հոդվածում կատարել փոփոխություն, որի համաձայն՝ բժշկական օգնության և սպասարկման ծառայություններ մատուցող կազմակերպությունների և անհատ ձեռնարկատերերի համար պարտադիր կլինի կիրառել էլեկտրոնային հսկիչ դրամարկղային մեքենա։ Նշվում է, որ եթե վճարումն իրականացվել է վճարային տեխնոլոգիաների հիման վրա կիրառվող վճարային գործիքների միջոցով, ապա այս դեպքում նույնպես էլեկտրոնային ՀԴՄ ունենալը պարտադիր կլինի։ Նախագիծն առաջին ընթերցմամբ ԱԺ-ում ներկայացրել է «Քաղաքացիական պայմանագիր» խմբակցության պատգամավոր Ծովինար Վարդանյանը։

Պատգամավորի խոսքով՝ նախագիծը հնարավորություն է ստեղծում, որպեսզի բժշկական ծառայություններ մատուցող կազմակերպություններում վճարային տերմինալներով վճարում կատարելիս քաղաքացուն ավտոմատ տրամադրվի էլեկտրոնային ՀԴՄ։ Նա նշել է, որ այս փոփոխությամբ, նախ, ՀԴՄ տրամադրելու գործընթացում տվյալ բժշկական կազմակերպության հաշվապահությունը չի ծանրաբեռնվի, և երկրորդ՝ դա կզսպի կոռուպցիոն ռիսկերը հատկապես առողջության ապահովագրության մեխանիզմի ներդրումից հետո։

Ըստ Վարդանյանի՝ մասնավոր դեպքերը նույնպես կարտացոլվեն ArMed միասնական տեղեկատվական ցանցում, և չի կարող լինել դեպք, երբ մասնավոր վճարումից հետո տվյալը չմուտքագրվի համակարգ։

Հարակից զեկուցող, ՊԵԿ նախագահի տեղակալ Համլետ Սահակյանը պարզաբանել է, որ փոփոխությամբ նախատեսվում է բժշկական ծառայությունների մասով ՀԴՄ-ի տրամադրումը բոլոր ծառայությունների համար՝ ոչ միայն քարտային վճարումների, այլև տերմինալների միջոցով իրականացվող վճարումների դեպքում։ Նա հավելել է, որ ՀԴՄ-ն կապվելու է ArMed համակարգի հետ, և ՀԴՄ-ում կարտացոլվի նաև ArMed-ի համապատասխան գրանցման կոդը՝ առանց անձնական տվյալների արտացոլման։ Նրա խոսքով՝ ՊԵԿ-ին անձնական տվյալներ հայտնի չեն լինի, այլ միայն կարձանագրվի, որ տվյալը գրանցված է ArMed համակարգում։