Մոսկվան արձանագրում է ԵՄ-ի լռությունը. ՌԴ ԱԳՆ
Ռուսաստանի արտաքին գործերի նախարարի տեղակալ Ալեքսանդր Գրուշկոն հայտարարել է, որ եվրոպական պետությունները մինչ այժմ չեն արձագանքել Մոսկվայի առաջարկին՝ ստորագրելու փաստաթուղթ, որը կերաշխավորի Եվրոպայի նկատմամբ չհարձակման պարտավորությունը։ Այս մասին նա ասել է «Իզվեստիա» թերթին տված հարցազրույցում։
Գրուշկոյի խոսքով՝ Եվրամիության դիրքորոշման մեջ նման դրույթ առհասարակ չկա, մինչդեռ Բրյուսելը շարունակաբար փորձում է ներգրավվել բանակցային գործընթացում։ Նա նշել է, որ ԵՄ-ի այս մոտեցումը փաստացի բացառում է միության մասնակցությունը խաղաղ կարգավորման քննարկումներին։
ՌԴ ԱԳ փոխնախարարը նաև ընդգծել է, որ Եվրամիությունը համերաշխություն է հայտնում Ուկրաինային անվտանգության երաշխիքներ տրամադրելու հարցում, սակայն նույն պայմանը չի ձևակերպում Ռուսաստանի համար։ Նրա խոսքով՝ առանց Մոսկվայի անվտանգության երաշխիքների որևէ խաղաղության պայմանագիր հնարավոր չէ։
