Խարդախության դեմ նոր սահմանափակումներ ՌԴ-ում
Ռուսաստանի Պետդուման առաջին ընթերցմամբ ընդունել է կառավարության մշակած օրինագիծը, որը ներառում է առցանց և հեռախոսային խարդախության դեմ պայքարի երկրորդ միջոցառումների փաթեթը։ Փաստաթուղթը պարունակում է շուրջ 20 նախաձեռնություն և նախատեսում է մի շարք սահմանափակումներ քաղաքացիների ու շուկայի մասնակիցների համար։
Օրինագծով առաջարկվում է սահմանափակել մեկ անձի կողմից ձևակերպվող բանկային քարտերի քանակը․ ընդհանուր առմամբ՝ մինչև 20 քարտ, իսկ մեկ բանկում՝ առավելագույնը հինգ։ Կապի օպերատորները պարտավոր կլինեն նշում կատարել միջազգային մուտքային զանգերի դեպքում, ինչպես նաև նախատեսվում է ներդնել «մանկական» SIM քարտեր՝ անչափահասներին խարդախներից և վնասակար բովանդակությունից պաշտպանելու նպատակով։
Փոփոխությունները վերաբերում են նաև թվային ծառայություններին։ «Պետծառայություններ» հարթակի հաշվի հասանելիությունը հնարավոր կլինի վերականգնել տարբեր եղանակներով՝ ՄՖՑ անձնական այցելությամբ, մեսենջերի միջոցով, բանկերի հավելվածներով և կայքերով, ինչպես նաև կենսաչափական տվյալների կամ ուժեղացված էլեկտրոնային ստորագրության կիրառմամբ։
Օրինագծի համաձայն՝ 2026 թվականի սեպտեմբերի 1-ից օտարերկրյա համարներից մուտքային զանգերը կբլոկավորվեն, եթե բաժանորդը նախապես համաձայնություն չտա դրանց ընդունման համար։
