Գալուզինը՝ TRIPP-ի վերաբերյալ Մոսկվայի դիրքորոշման մասին

Ռուսաստանը պատրաստ է քննարկել Երևանի հետ TRIPP նախագծի շրջանակում Մոսկվայի հնարավոր մասնակցության պայմաններն ու ձևաչափերը։ Այդ մասին «Իզվեստիային» տված հարցազրույցում հայտարարել է ՌԴ արտաքին գործերի նախարարի տեղակալ Միխայիլ Գալուզինը։

Նրա խոսքով՝ «Թրամփի ճանապարհ» անվանումը կրող նախաձեռնության վերաբերյալ Ռուսաստանի դիրքորոշումը առայժմ պահուստային է, քանի որ անհրաժեշտ է մանրամասն ուսումնասիրել հայ-ամերիկյան նախագծի բովանդակությունն ու առաջարկվող լուծումները։ Միևնույն ժամանակ Մոսկվան պատրաստակամ է Երևանի գործընկերների հետ անցկացնել խորհրդակցություններ՝ ինչպես նախագծի հիմնական պարամետրերի, այնպես էլ Ռուսաստանի հնարավոր մասնակցության տարբերակների շուրջ։

Գալուզինը հիշեցրել է, որ Հայաստանի երկաթուղային ցանցը մինչև 2038 թվականը կառավարվում է «Ռուսական երկաթուղիներ» ընկերության դուստր կազմակերպության կողմից, երկրում կիրառվում է ռուսական ստանդարտի երկաթուղային գիծ, իսկ Իրանի հետ սահմանին տեղակայված են ռուս սահմանապահներ։

ՌԴ ԱԳ փոխնախարարը նաև ընդգծել է Հայաստանի անդամակցությունը Եվրասիական տնտեսական միությանը՝ նշելով, որ այդ գործոնների համադրության պայմաններում հաղորդակցությունների նախագծերում Ռուսաստանի մասնակցությունը դժվար է անտեսել։ Բացի այդ, նա տեղեկացրել է, որ տարածաշրջանային հաղորդակցությունների ապաշրջափակման ուղղությամբ արդեն իսկ առկա են էական մշակումներ՝ Ռուսաստանի, Հայաստանի և Ադրբեջանի եռակողմ ձևաչափում՝ փոխվարչապետերի մակարդակով։