Վենսին սուլոցներով են դիմավորել․ Կալլասի մեկնաբանությունը․ Politico

Եվրոպական դիվանագիտության ղեկավար Կայա Կալլասը անդրադարձել է ԱՄՆ փոխնախագահ Ջեյ Դի Վենսի հասցեին հնչած սուլոցներին՝ դրանք բնորոշելով որպես «եվրոպական հպարտության» դրսևորում։ Նրա խոսքերը փոխանցել է Politico-ն։

Կալլասի խոսքով՝ վերջին շրջանում Միացյալ Նահանգներից Եվրոպայի հասցեին հնչել են ոչ հաճելի հայտարարություններ, ինչի ֆոնին եվրոպական հանրության արձագանքը, նրա գնահատմամբ, արտահայտել է սեփական արժանապատվության զգացումը։ Նա նշել է, որ այդ վերաբերմունքը նկատելի էր նաև մարզադաշտում։

Միջադեպը տեղի է ունեցել 2026 թվականի ձմեռային Օլիմպիական խաղերի բացման արարողության ընթացքում, որը անցկացվել է Միլանի «Սան Սիրո» մարզադաշտում։ Ամերիկյան պատվիրակության անցման ժամանակ մեծ էկրաններին ցուցադրվել են Ջեյ Դի Վենսը և նրա կինը, ինչին որոշ հանդիսատեսներ արձագանքել են սուլոցներով և բացասական բացականչություններով։

Հավելենք՝ ավելի վաղ Սպիտակ տունը հրապարակել է ԱՄՆ ազգային անվտանգության նոր ռազմավարությունը, որտեղ նշվում է, որ Եվրոպան պետք է ավելի մեծ պատասխանատվություն կրի սեփական պաշտպանության հարցում։ Փաստաթղթում նաև արձանագրվում է, որ Վաշինգտոնը տարաձայնություններ ունի եվրոպացի պաշտոնյաների հետ Ուկրաինայի վերաբերյալ։ Այս համատեքստում ՌԴ արտգործնախարար Սերգեյ Լավրովը հայտարարել է, որ ռազմավարությունը կոչված է ցույց տալու Եվրամիության տեղը և կանխելու Վաշինգտոնի ներգրավումը, նրա ձևակերպմամբ, եվրոպական նախաձեռնություններում։