Էլեկտրոնային ստորագրության պարտադիր պահանջի կիրառման ժամկետները կարող են վերանայվել․ Թորոսյան

Մենք տեսնում ենք իրավիճակը և գնահատում ենք, թե ինչքան սուր է այն, և համապատասխան լուծումներ ենք հիմա մշակում: Մոտ օրերս վերջնական կասենք: Այդ մասին ճեպազրույցի ժամանակ ասել է ԱՍՀ նախարար Արսեն Թորոսյանը՝ անդրադառնալով աշխատանքի ընդունվելիս էլեկտրոնային ստորագրություն ունենալու պարտադիր պայմանին, որն այս տարվանից սկսել է գործել:

«Մի կարևոր հանգամանք կա. քանի որ նույնականացման քարտերի և անձնագրերի նոր համակարգ ենք ներդնում, որը պետք է այս տարի ավելի ուշ գործարկվի, խնդիր է առաջանում այս պահին տրամադրվող ID քարտերի և ապագայում տրամադրվող ID քարտերի հետ բալանսի միջև: Նաև դրանով պայամանավորված՝ կարող է լուծումներ գտնենք, որովհետև եթե նույնիսկ հիմա օրուգիշեր աշխատեն այդ սարքերը, թեև սահմանափակ թողունակություն ունեն, հետո կարիք է լինելու անցում կատարել նորերին:

Դրանով ու որոշ այլ պատճառներով պայմանավորված՝ հնարավոր է ժամկետների վերանայում իրականացնենք, այսինքն՝ օրենքի կիրառման ժամկետներ վերանայենք, որպեսզի չզրկվի իր աշխատանքի իրավունքից այդ պատճառով, քանի որ նոր կնքվող աշխատանքային պայմանագրերը հիմա պետք է լինեն էլեկտրոնային»,- ասել է նա:

Նախարարը տեղեկացրել է, որ կա մոտ 200 հազար քաղաքացի, որ չունի էլեկտրոնային ստորագրություն, և պետք է անել այնպես, որ անցումը լինի «անցավ»:

«Նաև մտադրություն կա թողնելու կամավոր այդ ամեն ինչը: Բայց դրանք նախնական քննարկումներ են, վերջնականը մոտ օրերս կասենք»,- ասել է նա: