Ուկրաինան ենթարկվել է զանգվածային հարվածների
Ուկրաինայի մի շարք քաղաքներ գիշերվա ընթացքում ենթարկվել են լայնածավալ հրթիռային և դրոնային հարվածների։ Առավել ծանր իրավիճակ է գրանցվել Կիևում և Խարկովում, որտեղ վնասվել են քաղաքացիական և էներգետիկ ենթակառուցվածքներ։
Մայրաքաղաքում, տեղական իշխանությունների տվյալներով, լսվել են բազմաթիվ պայթյուններ։ Կիևի քաղաքապետ Վիտալի Կլիչկոն հայտնել է, որ Դառնիցկի շրջանում հարված է հասցվել ոչ բնակելի շինության և մանկապարտեզի։ Կիևի քաղաքային ռազմական վարչությունը (ԿՄՎԱ) տեղեկացրել է նաև Դեսնյանսկի շրջանում գտնվող ոչ բնակելի կառույցի, ինչպես նաև Շևչենկոյի շրջանում գտնվող բազմաբնակարան շենքի վնասման մասին։
Խարկովում հարվածները շարունակվել են մի քանի ժամ։ Քաղաքապետ Իգոր Տերեխովի խոսքով՝ թիրախավորվել է քաղաքի էներգետիկ ենթակառուցվածքը, ինչի հետևանքով առաջացել են լուրջ վնասներ։ Նա նախազգուշացրել է, որ քաղաքային իշխանությունները ստիպված են լինելու ընդունել «ծանր, բայց անխուսափելի որոշումներ»։
Տերեխովի հայտարարության համաձայն՝ ջեռուցման համակարգի սառեցումից խուսափելու համար անհրաժեշտ է ջերմակիր հեղուկը հեռացնել 820 բնակելի շենքերից, որոնք ջերմություն են ստանում քաղաքի խոշորագույն ջերմաէլեկտրակայաններից մեկից։ Քաղաքապետը նշել է, որ այս քայլը չափազանց բարդ է հատկապես շուրջ 20 աստիճան սառնամանիքի պայմաններում, սակայն ենթակառուցվածքների դեմ իրականացված աննախադեպ հարձակումը այլընտրանք չի թողնում։
Պայթյուններ են լսվել նաև Զապորոժիեում, Դնեպրում, Օդեսայի մարզում և երկրի այլ տարածաշրջաններում։ Տեղական իշխանությունները շարունակում են գնահատել հասցված վնասների ծավալը։
