Հալեպի օդանավակայանը և ուսումնական հաստատությունները շարունակում են փակ մնալ

Սիրիայի քաղաքացիական ավիացիայի գլխավոր վարչությունը հայտարարել է դեպի Հալեպի միջազգային օդանավակայան և այնտեղից չվերթների կասեցումը մինչև 2026 թվականի հունվարի 8-ը, ժամը 23:00-ը երկարաձգելու մասին։ Այս մասին հայտնում է Syria TV-ին։

Քաղավիացիայի վարչությունը պարզաբանել է, որ որոշումը ժամանակավոր նախազգուշական միջոցառում է՝ կապված տեղի ունեցող զարգացումների հետ։

Կասեցման ժամանակահատվածում նախատեսված չվերթները կուղղորդվեն դեպի Դամասկոսի միջազգային օդանավակայան՝ մինչև անհրաժեշտ տեխնիկական և անվտանգության գնահատումների ավարտը։

Հալեպի նահանգապետարանն իր հերթին հայտարարել է հունվարի 8-ին քաղաքի դպրոցներում և համալսարաններում դասերի դադարեցման մասին։

Սիրիայի կառավարությունը Հալեպի իրավիճակի մասին հայտարարության մեջ պահանջել է Սիրիայի դեմոկրատական ​​ուժերի (ՍԴՈւ) զինված խմբավորումները դուրս բերել Շեյխ Մակսուդ և Աշրաֆիե թաղամասերից։

Սիրիայի կառավարությունը շեշտել է, որ բոլոր քաղաքացիների, այդ թվում՝ քուրդ քաղաքացիների պաշտպանությունը հիմնարար ազգային և իրավական պատասխանատվություն է և իրականացվում է առանց որևէ խտրականության։Հայտարարության մեջ նշվել է, որ համապատասխան մարմինները հաստատում են, որ լարվածության գոտիներից տեղահանվածները բացառապես քաղաքացիական անձինք են՝ բոլորը քուրդ քաղաքացիներ, որոնք լքել են իրենց տները՝ վախենալով լարվածության սրումից: Նրանք ապաստան են գտել պետության և նրա պաշտոնական հաստատությունների վերահսկողության տակ գտնվող տարածքներում:

«Սա հստակ ապացույց է Սիրիայի նկատմամբ քուրդ քաղաքացիների վստահության և նրանց պաշտպանությունն ու անվտանգությունն ապահովելու նրա կարողության մասին, և հերքում է նրանց նկատմամբ սպառնալիքի կամ թիրախավորման մասին պնդումները»,- ասվում է հայտարարության մեջ։

Հալեպում հունվարի 6-ին բախումներ են սկսվել քրդերի գլխավորած Սիրիայի դեմոկրատական ​​ուժերի (ՍԴՈւ) և սիրիական բանակի միջև, որոնք հանգեցրել են քաղաքացիական բնակչության շրջանում զոհերի և լայնածավալ նյութական վնասների։