Ռուսաստանը խզում է ռազմական պայմանագրերը Եվրոպայի 11 երկրների հետ
Ռուսաստանի պաշտպանության նախարարությունը ստացել է կառավարության հավանությունը՝ լուծարելու ռազմական համագործակցության վերաբերյալ մի շարք միջազգային փաստաթղթեր։ Խոսքը վերաբերում է 1992–2002 թվականներին կնքված 10 համաձայնագրի և մեկ համապատասխան հուշագրի դադարեցմանը։
Լուծարվող համաձայնագրերի ցանկում ընդգրկված են փաստաթղթեր, որոնք Ռուսաստանի Դաշնությունը ստորագրել էր մի շարք եվրոպական երկրների հետ։ Դրանց թվում են Գերմանիան, Լեհաստանը, Ռումինիան, Դանիան, Նորվեգիան, Նիդերլանդները, Խորվաթիան, Բելգիան և Չեխիան։
Բացի այդ, նախատեսվում է ուժը կորցրած ճանաչել Ռուսաստանի և Միացյալ Թագավորության պաշտպանության նախարարությունների միջև կնքված ռազմական համագործակցության հուշագիրը։ Նշված փաստաթղթերը կարգավորում էին կողմերի միջև ռազմական ոլորտում տարբեր ձևաչափերով փոխգործակցությունը։
Պաշտոնական հաղորդագրության մեջ չի հստակեցվում, թե պայմանագրերի դադարեցման գործընթացը երբ կավարտվի և ինչ իրավական ընթացակարգեր են նախատեսվում հետագա փուլերում։ Հայտնի է միայն, որ նախաձեռնությունը իրականացվում է Ռուսաստանի կառավարության հաստատմամբ։
