Վարչապետը՝ կենսաթոշակային տարիքի փոփոխության մասին

Աշխատանքի և սոցիալական հարցերի նախարարի հետ խոսել ենք, որ մենք որդեգրենք այն կոնցեպտը, որ 63 տարեկանը ոչ միայն կենսաթոշակի, այլև փոքր բիզնես սկսելու լավագույն տարիքն է: Այս մասին Կառավարության նիստի ժամանակ ասել է վարչապետ Նիկոլ Փաշինյանը:

«Կարծում եմ, որ 21-րդ դարում 63 կամ 65, 70-75 տարեկանը լրիվ ուրիշ կատեգորիա է, այսինքն՝ դա մարդու համար շատ լավ, շատ ծաղկուն տարիք է, եթե մարդը առողջ է, եթե մարդն առողջ չէ, 29 տարեկանն էլ է պրոբլեմ»,- նշել է նա։

Վարչապետի խոսքով՝ շահարկումները, թե այս խոսակցությունները կենսաթոշակային տարիքի փոփոխության նախապատրաստում է՝ կապ չունի իրականության հետ:

«Օրինակ՝ ինչո՞ւ է դժվար թոշակը բարձրացնել, հարգելի՛ գործընկերներ, մի պատճառով, որովհետև թոշակառուների թիվը շատ մեծ է՝ 660 000 մարդ: Այսինքն՝ 1000 դրամով թոշակ ավելացնելը տասնյակ միլիարդների ծախս է ենթադրում՝ պերմանենտ կերպով, որը հետո փաստացի հետշրջելի և ընդհատելի չէ»,- հավելել է վարչապետ Նիկոլ Փաշինյանը: