Իրանը միջուկային հրթիռներով կհարվածի ԱՄՆ-ին․Նեթանյահու
Իսրայելի վարչապետ Բենիամին Նեթանյահուն ամերիկյան լրատվամիջոցներին տված հարցազրույցում հայտարարել է, որ իր գնահատմամբ Իրանը նախատեսում է հեռահար միջուկային հրթիռներով սպառնալ Միացյալ Նահանգներին։ APA-ի փոխանցմամբ՝ նա ընդգծել է, որ Թեհրանն Իսրայելին դիտում է որպես միջանկյալ փուլ՝ Վաշինգտոնի դեմ հարվածներ իրականացնելու ճանապարհին։
«Իրանը մեզ (Իսրայելին) համարում է ընդամենը մի քայլ՝ Միացյալ Նահանգների վրա հեռահար միջուկային հրթիռներ արձակելու ճանապարհին։ Հետևաբար, երբ մենք կռվում ենք, մենք պաշտպանում ենք ոչ միայն Իսրայելը, այլև ազատ աշխարհը բարբարոսներից», - նշել է Նեթանյահուն։
Նեթանյահուն հերքել է այն մեղադրանքները, որ Իսրայելը ռազմական հանցագործություններ է կատարում Գազայում, ըստ նրա՝ «Իսրայելի բանակն այն բանակն է, որն ամենաշատն է աշխատում աշխարհում քաղաքացիական բնակչության շրջանում զոհերի կանխարգելման համար»։
Հարցազրույցում նա անդրադարձել է նաև Նյու Յորքի քաղաքապետ Զոհրան Մամդանիի հայտարարությանը, ըստ որի վերջինս կողմ է իր ձերբակալմանը։ Նեթանյահուն ասել է, որ մտադիր է այցելել Նյու Յորք և չի կարծում, որ նման հայտարարությունները կարող են խոչընդոտել այցը։
