ՔԿ-ն անդրադարձել է Քննչական կոմիտեում և ԱԱԾ-ում ձևավորված «հետին թվով գաղտնալսումների» սխեմային
Anticor.am հարթակում հրապարակվել է հետևյալ «Քննչական կոմիտեում և ԱԱԾ-ում ձևավորված «հետին թվով գաղտնալսումների» սխեման. AntiCor-ի բացահայտում» վերտառությամբ նյութը, որը տարածվել է նաև որոշ ԶԼՄ-ներով: Այս մասին հայտնում է ՔԿ խոսնակ Կիմա Ավդալյանը:
«Նյութի հեղինակը փորձել է տպավորություն ստեղծել, թե շփվել է քննիչների հետ, վերջիններս էլ իբր ասել են՝ «որևէ բան են գտնում», արդեն հետո են դիմում դատարան՝ հետին թվով թույլտվություն ստանալու համար», «գործնականում գրեթե ամեն գաղտնալսում օրինականացվում է հետին թվով, իսկ դատավորների գրասենյակները «կարկատում են հետադարձ ամսաթվերով որոշումներ, որպեսզի ստեղծվի իրավաչափության պատրանք»:
Տեղեկությունն ամբողջությամբ իրականությանը չի համապատասխանում, զրպարտություն է և ակնհայտորեն միտված է կառույցի հեղինակությունը վարկաբեկելուն:
Պահանջում ենք ամբողջությամբ հերքել հրապարակման մեջ տեղ գտած ձևակերպումները և զերծ մնալ ապատեղեկատվություն տարածելուց»,- ասված է հաղորդագրության մեջ:
