Էլեկտրամոբիլների ներմուծման համար արտոնություններ կգործեն․ Պապոյան

Էլեկտրական ավտոմեքենաների ներմուծման ԱԱՀ-ից ազատման ժամկետը նախատեսվում է երկարաձգել մինչև 2026 թվականի դեկտեմբերի 31-ը՝ կիրառելով միայն 2024-ից հետո արտադրված մեքենաների վրա։ ԱԺ տնտեսական հարցերի մշտական հանձնաժողովում «Հայաստանի Հանրապետության հարկային օրենսգրքում լրացում կատարելու մասին» օրենքի նախագիծը ներկայացրել է ՀՀ էկոնոմիկայի նախարար Գևորգ Պապոյանը։ Նրա խոսքով՝ առաջարկվում է ևս մեկ տարով երկարացնել ԱԱՀ-ից ազատման գործող արտոնությունը, որը վերաբերում է էլեկտրական շարժիչով մեծ, միջին և փոքր ավտոբուսներին, մարդատար մեքենաներին, մոտոցիկլետներին և մոպեդներին։

Ներկայումս այս տրանսպորտային միջոցները ԱԱՀ-ից ազատված են մինչև 2026 թվականի հունվարի 1-ը, իսկ արտոնությունը գործում է 2019 թվականից։

Էլեկտրական տրանսպորտային միջոցների երրորդ երկրներից ներմուծման համար գործում է նաև մաքսատուրքից ազատման արտոնություն։ Մաքսային միության հանձնաժողովի որոշմամբ՝ Հայաստանին հատկացվել է 7000 միավոր սակագնային քվոտա 2022 թվականին, իսկ 2023-ին, 2024-ին և 2025-ին՝ 8000-ական միավոր, որոնց ներմուծման դեպքում մաքսատուրք չի գանձվում։

Պապոյանը նշել է, որ ԱԱՀ-ի և մաքսատուրքերից ազատումը զգալիորեն ավելացրել է էլեկտրական տրանսպորտային միջոցների ներմուծումը։ 2023 թվականին ներմուծվել է 9635 միավոր, ինչը 2022-ի համեմատ աճել է 75 տոկոսով։ 2024 թվականին ներմուծվել է 11 793 միավոր, 2023-ի համեմատ՝ 22 տոկոսով։ 2019 թվականի համեմատ 2024-ին ներմուծման ծավալը աճել է շուրջ 17.6 անգամ։

ՊԵԿ-ի տվյալներով՝ այս տարվա հունվարի 1-ից մինչև նոյեմբերի 19-ը ՀՀ է ներմուծվել 7 էլեկտրական ավտոբուս, 16 381 ավտոմեքենա և 2479 մոպեդ։ Կանխատեսվում է, որ էլեկտրական մեքենաների ներմուծումը տարվա ընթացքում կկրկնապատկվի նախորդ տարվա համեմատ։

Առաջարկվում է արտոնությունը կիրառել միայն այն էլեկտրական տրանսպորտային միջոցների վրա, որոնք թողարկված են 2023 թվականի դեկտեմբերի 31-ից հետո, այսինքն՝ 2024, 2025 և 2026 թվականների արտադրության համար։ Հանձնաժողովը դրական եզրակացություն է տվել նախագծին, որը կներկայացվի ԱԺ լիագումար նիստում։