ԱԺ հանձնաժողովը հավանություն տվեց կենդանիների նկատմամբ պատասխանատու վերաբերմունքի մասին օրենքին
Ազգային ժողովի Տարածքային կառավարման, տեղական ինքնակառավարման, գյուղատնտեսության և շրջակա միջավայրի պահպանության հարցերի մշտական հանձնաժողովը հավանություն տվեց «Կենդանիների նկատմամբ պատասխանատու վերաբերմունքի մասին» օրենքների նախագծերի փաթեթին: Փաթեթը հեղինակել են «Քաղաքացիական պայմանագիր» խմբակցության պատգամավոր Մերի Գալստյանն ու Արուսյակ Մանավազյանը:
«Մեր օրենսդրությամբ՝ մինչ այս պահը կենդանին համարվում է գույք, և տեր չունեցող կենդանին, այսինքն՝ թափառող կենդանին, համարվում է անտեր գույք՝ դրանից բխող համապատասխան հետևանքներով: Դա ամրագրված է քաղաքացիական օրենսգրքում, և մենք ներմուծել ենք համապատասխան հոդվածներում փոփոխություն, որպեսզի կենդանու նկատմամբ, բացի գույքային իրավունքներից, կիրառվեն նաև մեր օրենքի դրույթներն ու սկզբունքները: Սա է ամենակարևորը արձանագրել, որ կենդանին, բացի գույքային իրավունքներից, ունի նաև այլ իրավունքներ, որոնք ամրագրվելու են այս մայր օրենքով և անտեր կենդանին ունի սեփականատեր, այսինքն՝ պատասխանատու անձ, և դա պետությունն է»,- ասաց Մերի Գալստյանը:
Պատգամավորը նշեց՝ հանրության լայն շերտերին մտահոգում է հատկապես թափառող կենդանիների հարցը, որը լուրջ խնդիր է, թե՛ առողջապահական, թե՛ անվտանգային առումով:
«Մենք փորձել ենք այս օրենքի և հարակից օրենքների շրջանակներում ապահովել որոշակի ներդաշնակ հավասարակշռված մոտեցում, որպեսզի ապահովեն և կենդանիների իրավունքների պաշտպանությունը և մարդկանց անվտանգությունը և իրավունքները և ապահովենք կենդանի-մարդ համերաշխ և անվտանգ համակեցությունը։ Օրենքի կարգավորման առարկա են տնային, թափառող, ծառայողական, ցուցադրման, սպորտային և ժամանցային միջոցառումների համար օգտագործվող կենդանիները: Վայրի կենդանիներին կամ գյուղատնտեսական նշանակության կենդանիներին այս օրենքը որևէ ձևով չի անդրադառնում»,- նշեց օրենքի համահեղինակը:
Դրական եզրակացության արժանացած օրինագծերի փաթեթը կքննարկվի խորհրդարանի լիագումար նիստում:
