Բազմաթիվ պետություններ հրաժարվել են Հայաստանին մատակարարել սպառազինություն և տեխնիկա. Փաշինյան
ՀՀ վարչապետ Նիկոլ Փաշինյանի խոսքով՝ երկար տարիներ Հայաստանը ունեցել է զգալի սահմանափակումներ ռազմատեխնիկական ոլորտում տարբեր երկրների հետ համագործակցության ժամանակ։ Նա նշել է, որ բազմաթիվ պետություններ հրաժարվել են մատակարարել սպառազինություն և տեխնիկա՝ համոզված լինելով, թե դրանք կարող են օգտագործվել Հայաստանի միջազգայնորեն ճանաչված, ինքնիշխան տարածքից դուրս։
Վարչապետը ընդգծել է, որ այժմ նման սահմանափակումներ չկան, քանի որ երկրի արտաքին քաղաքականության հիմքում դրվում է 1991 թվականի Ալմա-Աթայի հռչակագիրը և Հայաստանի միջազգայնորեն ճանաչված տարածքի պաշտպանության լեգիտիմ խնդիրը։
Նրա խոսքով՝ լեգիտիմությունը ինքնին չի երաշխավորում անվտանգությունը, սակայն ապահովում է ավելի բարձր անվտանգություն և ավելի ցածր խոցելիություն, ինչպես նաև հնարավորություն է տալիս հասանելիություն ստանալ ժամանակակից պաշտպանական միջոցների և տեխնոլոգիաների։
Փաշինյանը հավելել է, որ լեգիտիմությունը նվազեցնում է պատերազմի հավանականությունը և միաժամանակ թույլ է տալիս բազմապատկել պաշտպանական կարողությունները, քանի որ որևէ պետություն չի կարող կասկածի տակ առնել սեփական միջազգայնորեն ճանաչված տարածքային ամբողջականությունը պաշտպանելու իրավունքը։ Նրա խոսքով՝ այս մոտեցումը էականորեն մեծացնում է սպառազինության և տեխնիկայի ձեռքբերման, ինչպես նաև պաշտպանական տեխնոլոգիաներին հասանելիության հնարավորությունները։
