Ֆուտբոլի աշխարհի առաջնության տոմսերը չեն երաշխավորում ԱՄՆ մուտքի արտոնագրերի տրամադրումը․ Ռուբիո
ԱՄՆ պետքարտուղար Մարկո Ռուբիոն հայտարարել է, որ 2026 թվականի ֆուտբոլի աշխարհի առաջնության տոմսերը չեն ապահովում երկիր մուտք գործելու վիզայի automատիկ ստացում։ Նրա խոսքով՝ տոմսը կարող է միայն արագացնել հյուպատոսությունում հարցազրույցի հերթագրումը, սակայն բոլոր դիմողները անցնելու են նույն ստուգողական գործընթացը, ինչպես ԱՄՆ մուտք գործող մյուս օտարերկրացիները։
«Միակ տարբերությունն այն է, որ ձեզ կդնենք հերթի սկզբում»,- նշել է Ռուբիոն՝ հորդորելով երկրպագուներին հնարավորինս շուտ դիմել վիզայի համար։ Նա հավելել է, որ հարցազրույցը սովորաբար նշանակվում է դիմումից «6–8 շաբաթ» անց և զգուշացրել է չսպասել վերջին պահին։
Հանդիպումը ղեկավարող ԱՄՆ նախագահ Դոնալդ Թրամփն իր հերթին վստահեցրել է, որ հյուպատոսական ծառայությունները առաջնահերթություն կտան առաջնություն մեկնող երկրպագուներին։ Թրամփը նշել է, որ վերջին տարիներին վիզայի ստացման սպասման ժամանակը կրճատվել է մինչև 60 օր կամ պակաս՝ ընդգծելով վարչակազմի վարչարարական բարելավումները։
Նա նաև նշել է, որ Աշխարհի առաջնությունն ԱՄՆ-ին կարող է բերել ավելի քան 30 միլիարդ դոլար եկամուտ։ Միաժամանակ Թրամփը կրկին ակնարկում է հնարավորություն այն քաղաքներից խաղերի տեղափոխման, որոնք, ըստ նրա, բավարար միջոցներ չեն ձեռնարկի անվտանգության ապահովման համար։ Որպես օրինակ նա մատնանշել է Սիեթլը՝ վստահեցնելով, որ նման որոշումը չի առաջացնի առարկություններ ՖԻՖԱ-ի կողմից։ Միջոցառմանը ներկա ՖԻՖԱ-ի նախագահ Ջաննի Ինֆանտինոն միայն ընդգծել է, որ անվտանգությունն առաջնահերթություն է։
2026 թվականի աշխարհի առաջնությունը տեղի է ունենալու ԱՄՆ-ում, Կանադայում և Մեքսիկայում՝ հունիսի 11-ից հուլիսի 19-ը։ Ռուսաստանի հավաքականը 2022 թվականի փետրվարից հեռացված է միջազգային մրցաշարերից։
