Պատրաստվում են ռուսների զանգվածային արտաքսմանը․ ՌԴ ԱԳՆ-ի աղմկահարույց հայտարարությունը

Բալթյան երկրների իշխանությունները պատրաստվում են ռուսալեզու բնակիչների զանգվածային արտաքսումներին, հայտարարել է Ռուսաստանի Դաշնության Արտաքին գործերի նախարարության մարդու իրավունքների հարցերով բազմակողմ համագործակցության դեպարտամենտի տնօրեն Գրիգորի Լուկյանցևը։

«Բալթյան երկրները բացահայտորեն նախապատրաստվում են ռուսալեզու բնակիչների զանգվածային արտաքսմանը՝ հավանաբար այդ կերպ փորձելով վերջնականապես լուծել «ռուսական հարցը» և իրենց տարածքներում առկա զանգվածային քաղաքացիազրկման՝ հատկապես XXI դարի համար աննախադեպ խնդիրը», - ասել է Լուկյանցևը առանձին երկրների մարդու իրավունքների իրավիճակի վերաբերյալ զեկույցի շնորհանդեսի ժամանակ։

Դրանից առաջ Ռուսաստանի Դաշնության Արտաքին գործերի նախարարությունը հայտարարել էր, որ մտադիր է դիմել ՄԱԿ-ի Միջազգային դատարան՝ Լատվիայում, Լիտվայում և Էստոնիայում էթնիկ ռուսների իրավունքների «համակարգված խախտումների» պատճառով։ 

Գերատեսչությունում նշել էին, որ Բալթյան երկրների իշխանությունները «արգելում են» ռուսերեն լեզվի օգտագործումը, «վերաշարադրում են պատմությունը» և վարում են «պատժիչ ճնշումների և ահաբեկման քաղաքականություն»։