Իրավիճակը՝ Վաղարշապատում․ ՆԳՆ ներկայացուցիչը մանրամասներ է ներկայացրել

Ժամը 16։00-ի դրությամբ տրամադրել ենք 51 տեղեկանք, որոնք ձևավորված լրացուցիչ ընտրական ցուցակներում ընդգրկվելու մասին են, այսինքն բոլոր նրանց համար են նախատեսված, որոնք ունեն ընտրելու իրավունք, բայց ինչ-ինչ պատճառներով դուրս են մնացել նախապես ձևավորված ընտրական ցուցակներից։ Այս մասին լրագրողների հետ զրույցում հայտնել է ՆԳՆ միգրացիայի և քաղաքացիության ծառայության պետ Նելլի Դավթյանը՝ հավելելով, որ նրանք այդ տեղեկանքների միջոցով ներգրավվում են լրացուցիչ ընտրական ցուցակներում։

«Մենք ունենք ընտրելու իրավունք ունեցող քաղաքացիներ և այլ իրավական կարգավիճակ ունեցող անձինք, ում փաստաթղթի ժամկետը լրացած է, մասնավորապես ՀՀ քաղաքացիների մասով մենք տրամադրել ենք 45 տեղեկանք։ Մենք տրամադրում ենք փոխարինող փաստաթուղթ, որով անձը մոտենում և իրացնում է իր ընտրելու իրավունքը»,- նշել է նա։

Դավթյանը հավելել է, որ քաղաքացիներին նաև խորհրդատվական ծառայություններ են մատուցվում։

«Շատերը մոտենում են և ասում, որ իրենց տան հասցեում հայտնաբերել են այս կամ այն անունով, ազգանունով անձի, որն իրենց ծանոթ չէ, խնդրում են հեռացնել հաշվառումից կամ պարզաբանում են խնդրում»,- հավելել է ՆԳՆ միգրացիայի և քաղաքացիության ծառայության պետը:

«Այս անգամ ընտրություններին մասնակցելու իրավունք ունեցող Հնդկաստանի քաղաքացի չունենք, 573 օտարերացիներից 532-ը ՌԴ քաղաքացիներ են, 16-ը՝ Վրաստանի, մոտ 10 հոգի՝ Իրանի և Ուկրաինայի քաղաքացիներ»,- հավելել է Նելլի Դավթյանը։