Սևանա լճի մոտակայքում դի է հայտնաբերվել
Այսօր՝ նոյեմբերի 15-ին, Գեղարքունիքի մարզում տեղի է ունեցել առեղծվածային և ողբերգական դեպք։ Ժամը 13:30-ի սահմաններում ՆԳ նախարարության ոստիկանության քրեական ոստիկանության գլխավոր վարչության Գեղարքունիքի մարզային վարչությունը ստացել է օպերատիվ տեղեկություն, որ Սևանա լճում՝ Գրողների միության հանգստյան տան տարածքում, դի կա, գրում է Shamshyan.com-ը։
Տեղում պարզվել է, որ տեղեկատվությունը համապատասխանում է իրականությանը․ լճի ջրում բերանքսիվայր հայտնաբերված կնոջ դին դուրս է բերվել անվտանգ վայր։
Դեպքի փաստով Սևանի քննչական բաժնում նախաձեռնվել է քրեական վարույթ, իսկ քննիչի որոշմամբ նշանակվել է դիակի դատաբժշկական փորձաքննություն։ Դատաբժշկի նախնական դիտարկմամբ՝ դիակի վրա բռնության հետքեր չեն հայտնաբերվել։
Ոստիկանությունն ու քննչական բաժինը պարզում են մահացածի ինքնությունը։ Լճի ափին հայտնաբերվել են իրեր, որոնք, ըստ ամենայնի, պատկանում են մահացածին։
