Ալիևը հանդես է եկել նոր հայտարարություններով՝ Արևելք-Արևմուտք ու Հյուսիս-Հարավ միջանցքների հետ կապված
Ադրբեջանի նախագահ Իլհամ Ալիևը հայտարարել է, որ այսօր Ադրբեջանը և գործընկեր երկրները առաջատար դեր են խաղում Արևելք-Արևմուտք և Հյուսիս-Հարավ միջազգային տրանսպորտային միջանցքների զարգացման գործում։ Նրան հղված ուղերձը ներկայացվել է «Միջազգային տրանսպորտային ուղիների անվտանգության ապահովման գործում հատուկ ծառայությունների դերը» թեմայով միջազգային համաժողովում։
Ալիևի խոսքով՝ Ադրբեջանը շարունակաբար մեծ ներդրումներ է կատարում ժամանակակից երկաթուղային, ավտոմոբիլային, օդային և ծովային տրանսպորտային ենթակառուցվածքների զարգացման համար՝ դրանք դարձնելով տարածաշրջանային տարանցման առանցքային հանգույց։
«Մենք այս տրանսպորտային և հաղորդակցական ուղիները դիտարկում ենք ոչ միայն որպես տնտեսական բարգավաճման աղբյուր, այլև որպես թյուրքական պետությունների քաղաքական, մշակութային, պաշտպանական և անվտանգության ոլորտներում ավելի սերտ ինտեգրման կարևոր հիմք», – նշել է Ալիևը։
Նա ընդգծել է, որ տարածաշրջանային հաղորդակցային նախագծերը կարող են բարձրացնել նաև ընդհանուր անվտանգության մակարդակը՝ ամրապնդելով համագործակցությունը մասնակից երկրների միջև։
