Արփինե Հովհաննիսյանը՝ ՀԷՑ-ին լիցենզիայից զրկելու մասին

ՀԾԿՀ-ն քննարկում է ՀԷՑ-ին լիցենզիայից զրկելու հարցը։ Տեղի է ունենալու լիցենզիայից զրկում, որը հավասարազոր է սեփականազրկման։ Այսինքն տեղի է ունենալու սեփականության իրավունքից զրկում։ Այս մասին հայտարարել է իրավաբան Արփինե Հովհաննիսյանը։

«Սա ամենաբարդ, ամենադժվար ներգործության միջոցն է՝ իրավական տեսանկյունից հիմնավորման ենթակա, որի հիմքում ծանրակշիռ փաստեր պետք է դրված լինեն, որովհետև ակնհայտ է, որ թե միջնաժամկետ, թե երկարաժամկետ կտրվածքով այն չի կարող բացասական ազդեցություն չունենալ Հայաստանի ներդրումային միջավայրի և տարբեր վարկանիշային աղյուսակներում Հայաստանի տեղի ու դերի վրա»,-նշել է նա։

Հիշեցնենք` ՀՀ Ազգային ժողովը հուլիսի 3-ին 65 կողմ, 27 դեմ, 0 ձեռնպահ ձայներով երկրորդ ընթերցմամբ և ամբողջությամբ ընդունեց «Հանրային ծառայությունները կարգավորող մարմնի մասին» և «Էներգետիկայի մասին» օրենքներում նախատեսված փոփոխությունների և լրացումների փաթեթը (այլ կերպ ասած՝ ՀԷՑ-ի պետականացման նախագիծը)։