Ռուսաստանից եկած ցորենի մասին ի՞նչ են ասում, նորմա՞լ է, բավարարո՞ւմ է իրենց․ Ռուբինյանը՝ ընդդիմադիրներին

Ազգային ժողովի  փոխնախագահ Ռուբեն Ռուբինյանը խորհրդարանում լրագրողների հետ զրույցում անդրադարձել է ընդդիմության հայտարարություններին՝ Ղազախստանից Ադրբեջանի տարածքով Հայաստան բերված ցորենի վերաբերյալ։

Նա հիշեցրել է, որ ընդդիմությունը նախկինում հայտարարել էր՝ ապաշրջափակումը լինելու է միակողմանի և Հայաստանի համար ոչինչ չի փոխվելու։

«Հիմա իրենք քննարկում են, թե ցորենը որ կարգի է։ Սա, կարծում եմ, արդեն իսկ խոսուն է»,– նշել է Ռուբինյանը։

Անդրադառնալով ներկրված ցորենի որակին՝ նա ասել է․ «Ես ցորենի մասնագետ չեմ, երևի էկոնոմիկայի նախարարությանը հարցնեք։ Բայց չեմ կարծում, որ որևէ ձեռնարկատեր կցանկանա ներկրել ցորեն, որը իր նպատակին չի ծառայում։ Մեկ էլ, Ռուսաստանից եկած ցորենի մասին ի՞նչ են ասում, նորմա՞լ է, բավարարո՞ւմ է իրենց»։

Հիշեցնենք, որ Ղազախստանից Ադրբեջանի տարածքով Հայաստան բերված ցորենը 4-րդ կարգի է՝ հիմնականում անասնակերի համար, իսկ նույն երթուղով Ռուսաստանից ներկրված ցորենը բարձր կարգի է։