Կոտայքում ապօրինի արդյունահանել են 1500 խմ մարմարի հանույթ և իրացրել 24 միլիոն դրամով

Կոտայքի մարզում ընկերության պատասխանատուները շարունակել են մարմարի արդյունահանումը՝ չնայած թույլտվության ժամկետի ավարտին։ 

Ներքին գործերի նախարարության հաղորդմամբ՝ սահմանափակ պատասխանատվությամբ ընկերության իրավասու անձինք, խախտելով ընդերքի պահպանման և օգտագործման կանոնները, 2023 թվականին ժամկետը լրացած թույլտվությամբ շարունակել են հանքարդյունահանումը Կոտայքի մարզի Արզական գյուղի վարչական տարածքի «Սուլիձոր» տեղամասում։

Նախնական տվյալներով՝ ապօրինի արդյունահանվել է մոտ 1500 խմ մարմարի հանույթ, որը տեղափոխվել է նույն ընկերությանը պատկանող տեսակավորման կետ և իրացվել շուրջ 24 միլիոն դրամով։ Դրա հետևանքով պետության և համայնքի շահերին պատճառվել է առանձնապես խոշոր չափերի վնաս։

Նոյեմբերի 4-ին արդյունահանման վայրում ապօրինի ձեռնարկատիրական գործունեության կասկածանքով ձերբակալվել է չորս անձ, որոնք ներկայացվել են Կոտայքի մարզային քննչական վարչություն։ Նախաձեռնվել է քրեական վարույթ, կատարվածի հանգամանքները պարզվում են։