Բաքուն հրաժարվել է խաղաղապահներ ուղարկել Գազա

Ադրբեջանը չի պլանավորում իր խաղաղապահ ուժերը ուղարկել Գազայի հատված, քանի դեռ Իսրայելի և պաղեստինյան ՀԱՄԱՍ շարժման միջև մարտական գործողությունները լիովին չեն դադարել։ Ինչպես հաղորդում է Reuters-ը՝ հղում անելով ադրբեջանական աղբյուրներին, Բաքուն չի ցանկանում իր զինվորներին վտանգի ենթարկել։

«Սա կարող է տեղի ունենալ միայն ռազմական գործողությունների լիակատար դադարեցման դեպքում»,– նշել է գործակալության աղբյուրը։ Նրա խոսքով՝ նման որոշում կարող է ընդունվել միայն երկրի խորհրդարանի հաստատմամբ։

Խորհրդարանի անվտանգության հանձնաժողովի ղեկավարը հայտնել է, որ հանձնաժողովը դեռևս համապատասխան օրինագիծ չի ստացել։

Գործակալությունը նաև տեղեկացրել է, որ ԱՄՆ-ն, նախագահ Դոնալդ Թրամփի նախաձեռնած Գազայի խաղաղության ծրագրի շրջանակում, բանակցություններ է վարում Եգիպտոսի, Կատարի, Թուրքիայի, Ադրբեջանի, Ինդոնեզիայի և ԱՄԷ-ի հետ՝ շուրջ 20 հազար զինվորից բաղկացած Միջազգային կայունացման ուժերի (ISAF) հնարավոր ձևավորման վերաբերյալ։