Թեհրանը դատապարտել է Իսրայելի հարվածները Լիբանանին
Թեհրանը խստորեն դատապարտել է Իսրայելի ռազմական հարվածները Լիբանանի տարածքին՝ դրանք անվանելով «սիոնիստական ռեժիմի ագրեսիա» և տարածաշրջանային անվտանգությանն ուղղակի սպառնալիք։ Ինչպես հաղորդում է IRNA-ն՝ հղում անելով Իրանի արտաքին գործերի նախարարությանը, հարձակումները խախտում են Լիբանանի ինքնիշխանությունը և «միջազգային խաղաղության դեմ ուղղված հանցագործություն են»։
Իրանի ԱԳՆ-ն մեղադրել է Իսրայելին «էքսպանսիոնիստական քաղաքականությունն ընդլայնելու» մեջ, իսկ Միացյալ Նահանգներին՝ լարվածության սրման գործում ուղղակի «աջակցության և հանցակցության» համար։
«Այս գործողությունները հնարավոր չէին լինի առանց ամերիկյան հովանավորության»,– նշված է նախարարության հայտարարությունում։
Թեհրանի տվյալներով՝ նոյեմբերին կնքված հրադադարից ի վեր Լիբանանի տարածքի վրա Իսրայելի հարվածների հետևանքով զոհվել և վիրավորվել է ավելի քան 1000 մարդ, ինչպես նաև ոչնչացվել են քաղաքացիական ենթակառուցվածքներ և բնակելի թաղամասեր։
Հայտարարության մեջ ընդգծվում է, որ հարձակումները խոչընդոտում են Լիբանանի վերակառուցման գործընթացը և նպատակ ունեն «խաթարել նրա ինքնիշխանությունն ու անվտանգությունը»։ Իրանը կոչ է արել ՄԱԿ-ին և միջազգային հանրությանը ընդունել ավելի կոշտ դիրքորոշում Իսրայելի նկատմամբ, «պատասխանատվության ենթարկել նրան» և կանխել անպատժելիության ամրապնդումը։
Թեհրանը նաև ցավակցություն է հայտնել Լիբանանի ժողովրդին և վերահաստատել իր պատրաստակամությունը՝ աջակցելու «օրինական դիմադրությանը» երկրի ինքնիշխանության և սահմանների պաշտպանության գործում։
