Թրամփը ցանկանում է ՖԻՖԱ-ի նախագահին տեսնել ՄԱԿ-ի գլխավոր քարտուղարի պաշտոնում

ԱՄՆ նախագահ Դոնալդ Թրամփը ցանկանում է, որ ՖԻՖԱ-ի նախագահ Ջանի Ինֆանտինոն դառնա ՄԱԿ-ի հաջորդ գլխավոր քարտուղարը։ Այս մասին հայտնում է New York Post-ը՝ հղում անելով նախագահի մերձավոր աղբյուրին։

Պարբերականի տվյալներով՝ Թրամփն Ինֆանտինոյին գնահատում է որպես միջազգային հեղինակություն ունեցող գործչի, որը «կարողանում է միավորել մարդկանց»։ Նշվում է, որ նրանց հարաբերություններն ավելի են մտերմացել այս տարվա ֆուտբոլի աշխարհի առաջնության կազմակերպման ընթացքում։

Ըստ NYP-ի՝ դեռևս հայտնի չէ՝ արդյոք Ինֆանտինոն ցանկանո՞ւմ է զբաղեցնել այդ պաշտոնը, և որքանով է այդ հարցը քննարկվել Թրամփի հետ։

ՄԱԿ-ի նոր գլխավոր քարտուղարը պետք է ընտրվի այս տարի՝ փոխարինելով Անտոնիու Գուտերեշին, որի պաշտոնավարման ժամկետը կավարտվի դեկտեմբերի վերջին։ Ինֆանտինոյի թեկնածությունը հաստատվելու համար անհրաժեշտ կլինի ստանալ ՄԱԿ-ի Անվտանգության խորհրդի և այնուհետև Գլխավոր ասամբլեայի աջակցությունը։