Ես չեմ ասում արցախցիները փախել են, ես ասում եմ՝ Ղարաբաղի էլիտան է փախել. Նիկոլ Փաշինյան

2023 թվականին ԼՂ-ում տեղի ունեցած իրադարձություններից հետո վերլուծվել են մարտական գործողությունների արդյունքները: Այս մասին լրագրողների հետ ճեպազրույցի ժամանակ ասաց վարչապետ Նիկոլ Փաշինյանը:

«Կռվելու և այլնի մասին պնդումները չեն համապատասխանում իրականությանը։ Հետախուզության տվյալներով՝ առկա զենք-զինամթերքի առյուծի բաժինը մնացել է ձեռք չտված»,- ասաց Փաշինյանը՝ շարունակելով. «Ղարաբաղում իրականացրեցին իշխանափոխություն, շնորհավորում էին իրար: Այն, ինչ արեցին Ղարաբաղում, հաջորդիվ ուզում են անել Հայաստանում։  Իսկ այդ միֆերը՝ Ղարաբաղում կռվել են մինչև վերջ և այլն, իմիջիայլոց, կարիք լինի այդ տվյալները կգաղտնազերծենք: Ես համոզված եմ այս խմորը շատ ջուր կտանի, կսպասենք, որ լավ տանի, որ Լեռնային Ղարաբաղի բանակցային գործընթացի փաստաթղթերի նման ճիշտ պահին հրապարակեմ, սուտ է, չի եղել նման բան, փախել են, ճողոպրել են»,-ասել է Փաշինյանը:

Հաջորդիվ, պատասխանելով հարցերին, Փաշինյանը հավելեց. «Ես չեմ ասել և չեմ ասում, որ արցախցիները փախել են, ես ասում եմ, որ Ղարաբաղի էլիտան է փախել: Ես Ղարաբաղի ժողովրդին որևէ բանում ոչ մեղադրել եմ, ոչ մեղադրում եմ, ոչ էլ կմեղադրեմ»: