Ուկրաինայում կարտադրվեն բրիտանական նոր զինատեսակ` L119 հաուբիցներ

Ուկրաինան պայմանագիր է կնքել բրիտանական BAE Systems ընկերության մշակած հաուբիցների արտադրության համար։ Այս մասին հայտնում է The Wall Street Journal-ը։

Ըստ հրապարակման՝ համաձայնագիրը նախատեսում է L119 թեթև քարշակվող հաուբիցների լիցենզիոն արտադրություն Ուկրաինայում։ Դրանք կարող են խոցել թիրախներ մինչև 16,9 կմ հեռավորության վրա։

Նշվում է, որ այս քայլը կարող է օգնել Կիևին հետագայում կազմակերպել նաև արևմտյան այլ զինատեսակների արտադրություն, այդ թվում՝ Patriot ՀՕՊ համակարգերի հրթիռների։

Ավելի վաղ ԱՄՆ նախագահ Դոնալդ Թրամփը հայտարարել էր Ուկրաինային Patriot-ի հրթիռների արտադրության լիցենզիա տրամադրելու պատրաստակամության մասին, իսկ Ֆրանսիայի նախագահ Էմանուել Մակրոնը խոսել էր եվրոպական Aster հրթիռների արտադրության հնարավորության մասին։