Վրաստանի հայ համայնքը պահանջում է չեղարկել Բաքվի կազմակերպած համերգը
Վրաստանի հայ համայնքը հայտարարություն է տարածել՝ դատապարտելով Թբիլիսիում Ադրբեջանի դեսպանության կողմից կազմակերպված համերգը, որը նվիրված է 44-օրյա պատերազմի «Հաղթանակի օրվա» հինգերորդ տարելիցին։ Համայնքը միջոցառման անցկացումն անվանել է անընդունելի և կոչ է արել Վրաստանի իշխանություններին՝ չեղարկել այն։
«Դիմում ենք Վրաստանի Մշակույթի նախարարությանը՝ իր ուշադրության տակ առնի այն փաստը, որ նոյեմբերի 6-ին Ադրբեջանի դեսպանությունը կազմակերպում է համերգ՝ խորագրով «Հաղթանակի օրվա 5-րդ տարելից-Նոյեմբերի 8»։ Միջոցառումը նախատեսվում է անցկացնել Թբիլիսիի Շոթա Ռուսթավելու անվան պետական ակադեմիական թատրոնի մեծ դահլիճում, որը պատմականորեն կապված է հայ մշակույթի ներկայացուցիչների՝ Եսայի Պիտոյևի և Ալեքսանդր Մանթաշևի անունների հետ»,- ասված է հայտարարության մեջ։
«Վրաստանի մշակույթի նախարարությունը պետք է արտահայտի հստակ դիրքորոշում և կանխի պետական մշակութային հաստատություններում նման միջոցառումների անցկացումը, որոնք հակասում են հումանիզմի և մարդկային արժանապատվության սկզբունքներին»,- ընդգծված է հայտարարության մեջ։
