ՀՕՖ ղեկավարը՝ 3-ամյա Տիգրանի սպանությանը հնարավոր ականատես եղած երեխայի մասին

Սպանված 3-ամյա Տիգրանի քույրն ու եղբայրները այժմ գտնվում են Հայ օգնության ֆոնդի «երեխաների պաշտպանության կենտրոնում» և փորձում են հարմարվել նոր միջավայրին։

Կենտրոնի ղեկավար Միրա Անտոնյանը Aysor.am-ի հետ զրույցում նշել է, որ ավելի շատ մորն է պետք եղել նախապատրաստել երեխաներից բաժանմանը։

Նրա խոսքով՝ մասնագետները երկար զրուցել են մոր հետ՝ բացատրելով, որ սա երեխաներից զրկվելու գործընթաց չէ, և նա կարող է այցելել նրանց։

«Երեխաները հուզական առումով՝ սառած են, դա կարող է կապված լինել իրենց կյանքի բնույթի և վերջին շրջանում ուշադրության կենտրոնում հայտնվելու հետ։ Որ ասեմ՝ շատ դժվար բաժանվեցին, այդպես չէր։ Մայրն էլ իր էմոցիաներն արտահայտելու դժվարություն ունի»,– նշել է Անտոնյանը։

Նա հավելել է, որ այս փուլում երեխաներին անհրաժեշտ է ապահով ու հանգիստ միջավայր, որպեսզի կարողանան հարմարվել նոր պայմաններին։

«Եթե երեխան ականատես է եղել դեպքին, ապա այդ տրավմատիկ իրավիճակները պետք է հաշվի առնվեն։ Այժմ խոսքը վերաբերում է հարմարվելուն, ապահով զգալուն, ամենօրյա կենցաղը կազմակերպելուն և հետաքրքրությունները վերականգնելուն։ Պետք է բերենք սովորական վիճակի, հետո նոր սկսենք աշխատել տրավմայի հետ»,– նշել է Անտոնյանը։