Եթե պարզվի՝ Տիգրանի մայրը իմացել է ամուսնու վարքի մասին ու լռել, երեխաները նրան չեն վերադարձվի. ՀՕՖ ղեկավար

ՀՕՖ ղեկավար Միրա Անտոնյանը նշել է, որ դեռ պետք է գնահատվի՝ երեխաների շահերից ելնելով արդյոք ճիշտ կլինի նրանց վերամիավորումը մոր հետ։

Նրա խոսքով՝ եթե պարզվի, որ մայրը տեղյակ է եղել ամուսնու վարքից և լռել է, դա կարող է դառնալ հիմք, որպեսզի երեխաները չվերադառնան մոր մոտ։

«Եթե գործ ունենք մոր հետ, որը չի կարողացել պաշտպանել իր երեխաներին ոչ միայն ամուսնուց, այլև այլ վտանգներից, ապա ճիշտ չէ, որ երեխաները վերադառնան: Իսկ եթե պարզվի, որ մայրը նույնպես բռնության զոհ է եղել, այդ հանգամանքը չի կարող պատճառ լինել, որ երեխաները զրկվեն ընտանիքից»,– նշել է Անտոնյանը՝ Aysor.am-ի հետ զրույցում։

Տիկին Անտոնյանը նաև ընդգծել է, որ Տիգրանի մահը պետք է դառնա ազդանշան հասարակության համար՝ կանխելու նման դեպքերը։ Նրա խոսքով՝ Հայաստանում կան հնարավորություններ, որոնք կարող են նպաստել, որ երեխաները մեծանան ապահով միջավայրում։

«Յուրաքանչյուր ընտանիք կարող է իր մասնակցությունը բերել։ Եթե կան ընտանիքներ, որոնք պատրաստ են որևէ երեխայի խնամքը ստանձնել, պետությունը նրանց ամսական վճարում է 135.000 դրամ։ Այժմ ունենք 140 ընտանիք, որոնք խնամում են 192 երեխայի։ Մեզ անհրաժեշտ են ավելի շատ ընտանիքներ»,– ասել է ՀՕՖ ղեկավար Միրա Անտոնյան։