ՏԵՍԱՆՅՈՒԹ.Վրաստան–Հայաստան սահմանին ծանր իրավիճակ է․ կան ուշաթափված երեխաներ

Վրաստան-Հայաստան սահմանին այսօր լարված իրավիճակ է ստեղծվել. երկար հերթերի, բարձր ջերմաստիճանի և դանդաղ սպասարկման հետևանքով մի քանի երեխայի ինքնազգացողությունը վատացել է, գրանցվել են նաև ուշաթափության դեպքեր։ Այս մասին հայտնում է Panorama.am-ը։

Լրատվամիջոցի թղթակցի փոխանցմամբ՝ այսօր Հայաստան են վերադառնում օրեր առաջ Քոբուլեթի համերգին մասնակցելու մեկնած հայկական պարի խմբերի անդամ երեխաներն ու նրանց ծնողները։

Ըստ Panorama.am-ի՝ սահմանային անցակետում վրացի սահմանապահների սակավաթիվ լինելու պատճառով անձնագրային հսկողությունն իրականացվում է դանդաղ, ինչի հետևանքով կուտակվել են մեծ հերթեր։ Բարձր ջերմաստիճանը, երկարատև սպասումը և մարդկանց կուտակումները հանգեցրել են նրան, որ մի շարք երեխաների ինքնազգացողությունը վատացել է, իսկ որոշ դեպքերում արձանագրվել են ուշաթափություններ։

Panorama.am-ը հրապարակել է նաև սահմանային անցակետում ստեղծված իրավիճակը ներկայացնող տեսանյութ։