Իրանը զանգվածային հարվածներ է հասցրել ամերիկյան ռազմական օբյեկտներին

Իրանի բանակը հայտարարել է, որ զանգվածային հարվածներ է հասցրել Քուվեյթում տեղակայված ամերիկյան Patriot  զենիթահրթիռային համալիրների դիրքերին, հաղորդում է Իրանի պետական հեռուստաալիքը։

Հայտարարության համաձայն՝ անօդաչու թռչող սարքեր են արձակվել նաև ամերիկացի զինվորականների կողմից օգտագործվող ռազմակայանի վառելիքի պահեստարանների, զինամթերքի պահեստի և կապի համակարգերի ուղղությամբ։

Միևնույն ժամանակ «Թասնիմ» գործակալությունը տեղեկացրել է Իրանի մի շարք քաղաքներում՝ Հորմուզի նեղուցի և Օմանի ծոցի ափերին, տեղի ունեցած հզոր պայթյունների մասին։

Նրա տվյալներով՝ պայթյուններ են գրանցվել Հորմոզգան նահանգի արևելքում գտնվող Բանդար Աբաս նավահանգստային քաղաքում։ Այնտեղ գործի են դրվել հակաօդային պաշտպանության միջոցները։

Առնվազն վեց պայթյուն է տեղի ունեցել Չաբահար և Քոնարաք քաղաքների շրջանում, որոնք գտնվում են Սիստան և Բելուջիստան նահանգում՝ Օմանի ծոցի ափին։

Ավելի վաղ Միացյալ Նահանգների նախագահ Դոնալդ Թրամփը հայտնել էր, որ ամերիկացի զինվորականները ծրագրում են առաջիկա երկու օրվա ընթացքում հզոր հարվածներ հասցնել Իրանին։ 

«Մենք այսօր երեկոյան ուժգին կհարվածենք նրանց, իսկ հետո՝ նաև վաղը», - ասել էր նա։