Դա փորձություն էր, և նրանք ձախողեցին այն․ Թրամփը՝ Իրանի մասին

ԱՄՆ նախագահ Դոնալդ Թրամփը հայտարարել է, որ Վաշինգտոնի և Թեհրանի միջև ստորագրված փոխըմբռնման հուշագիրը եղել է «փորձություն», որը, ըստ նրա, Իրանը չի անցել։

«Դա յուրատեսակ փորձություն էր, և նրանք ձախողեցին այն»,- ամերիկացի հաղորդավար Հյու Հյուիթի հետ հարցազրույցում ասել է Թրամփը, այս մասին փոխանցում է «Արմենպրես»-ը: 

ԱՄՆ նախագահը նշել է, որ Վաշինգտոնի համար սովորական մոտեցում է նախ փոխըմբռնման հուշագիր կնքելը, ապա՝ վերջնական համաձայնագրի հասնելը։ Սակայն, նրա խոսքով, Իրանը չի կատարել հուշագրով նախատեսված պայմանները։

Միևնույն ժամանակ Իրանի արտաքին գործերի նախարարության ներկայացուցիչ Էսմայիլ Բաղային ավելի վաղ հայտարարել էր, որ Թեհրանը երբեք չի խախտել ԱՄՆ-ի հետ ձեռք բերված պայմանավորվածությունը, իսկ դրա չկատարման ամբողջ պատասխանատվությունը կրում է Վաշինգտոնը։

ԱՄՆ-ի և Իրանի միջև փոխըմբռնման հուշագիրը ստորագրվել էր հունիսի 18-ին։ Չնայած ձեռք բերված պայմանավորվածությանը՝ հրադադարը մի քանի անգամ խախտվել է, իսկ վերջին օրերին կողմերը կրկին փոխադարձ հարվածներ են հասցրել։