Պենտագոնը գաղտնի տեղեկատվության արտահոսքի դեմ պայքարի հատուկ խումբ է ստեղծել

Պենտագոնը հայտարարել է Արդարադատության նախարարության հետ տեղեկատվության արտահոսքերի դեմ պայքարի համատեղ խմբի ստեղծման մասին:

ԱՄՆ պաշտպանության նախարարությունը և երկրի Արդարադատության նախարարությունը (գլխավոր դատախազությունը) ստեղծում են համատեղ աշխատանքային խումբ՝ Պենտագոնից գաղտնի տեղեկատվության արտահոսքերի դեմ պայքարի համար։ Այս մասին հայտարարել է ԱՄՆ պաշտպանության նախարար Փիթ Հեգսեթը։

Նրա խոսքով՝ տեղեկատվության արտահոսքի յուրաքանչյուր դեպքի ժամանակ կարևոր է հնարավորինս արագ անհրաժեշտ տվյալները փոխանցել Արդարադատության նախարարությանը և իրավապահ մյուս կառույցներին, այդ թվում՝ ՀԴԲ-ին, որպեսզի հնարավոր լինի արագ բացահայտել և պատասխանատվության ենթարկել մեղավորներին։

Հեգսեթը հայտնել է, որ Պենտագոնի իրավախորհրդատուի գրասենյակին լիազորել է համակարգել համագործակցությունը Արդարադատության նախարարության հետ։ Բացի այդ, պաշտպանության նախարարության բոլոր ստորաբաժանումներին հանձնարարել է առավելագույնը 48 ժամվա ընթացքում կատարել տեղեկատվության արտահոսքերի հետ կապված հարցումները։

«Գաղտնի և խիստ գաղտնի տեղեկատվությանը հասանելիությունը բարձրագույն վստահության դրսևորում է, և այդ վստահությունը դավաճանողները պատասխանատվության կենթարկվեն օրենքի ամբողջ խստությամբ», - ընդգծել է Հեգսեթը։