ԱՄԷ-ի դրոշի ներքո Հորմուզի նեղուցով ընթացող երկու լցանավ հրթիռային հարձակման են ենթարկվել

ԱՄԷ-ի պաշտպանության նախարարությունը հայտնել է, որ Իրանը հրթիռային հարձակում է իրականացրել Հորմուզի նեղուցում գտնվող երկու լցանավերի վրա։

Արաբական Միացյալ Էմիրությունների պաշտպանության նախարարության հաղորդմամբ՝ Օմանի տարածքային ջրերում՝ Հորմուզի նեղուցի հարավային անցուղում, իրանական երկու թևավոր հրթիռ է խոցել ԱՄԷ-ին պատկանող Mombasa և Bahia լցանավերը։

Հաղորդվում է, որ Mombasa լցանավի վրա զոհվել է անձնակազմի մեկ անդամ՝ Հնդկաստանի քաղաքացի։ Եվս ութ մարդ վիրավորվել է, որոնցից վեցը Հնդկաստանի, երկուսը՝ Ուկրաինայի քաղաքացիներ են։ Տուժածներից չորսի վիճակը գնահատվում է ծանր։

Հարձակման հետևանքով երկու լցանավերում էլ հրդեհ է բռնկվել։

ԱՄԷ-ի պաշտպանության նախարարությունը խստորեն դատապարտել է հարձակումը՝ հայտարարելով, որ երկրի զինված ուժերը գտնվում են բարձր պատրաստականության վիճակում և լիովին պատրաստ են արձագանքել ցանկացած սպառնալիքի։

Միաժամանակ, Մեծ Բրիտանիայի ծովային առևտրի օպերատիվ կենտրոնը (UKMTO) հայտնել է, որ Օմանի Կալհաթ քաղաքից մոտ 74 կմ հյուսիս-արևելք գտնվող շրջանում անհայտ արկով հարված է հասցվել մեկ այլ լցանավի։ Կապիտանի փոխանցմամբ՝ հարվածը հասցվել է նավի մեքենայական բաժանմունքին, սակայն անձնակազմի բոլոր անդամները գտնվում են անվտանգ վիճակում։