Telegram-ի t.me կարճ հղումները դադարել են աշխատել ամբողջ աշխարհում

Telegram մեսենջերի t.me կարճ հղումները, որոնց միջոցով օգտատերերը բացում են ալիքները, խմբերը և պրոֆիլները, դադարել են աշխատել ամբողջ աշխարհում։

Տեղեկությունների համաձայն՝ խնդիրը կապված է .me դոմենային գոտու օպերատորի կողմից կիրառված սահմանափակումների հետ։ Արդյունքում t.me հասցեն դուրս է մնացել համաշխարհային DNS համակարգից, ինչի պատճառով կարճ հղումները սովորական բրաուզերներում չեն բացվում։

Միաժամանակ խափանումը կապված չէ Ռոսկոմնադզորի կամ ռուսական ինտերնետ-պրովայդերների կողմից իրականացված արգելափակումների հետ։ Որոշ օգտատերերի մոտ t.me հղումները դեռ կարող են աշխատել՝ սարքի կամ ինտերնետ-պրովայդերի պահոցում (cache) պահպանված տվյալների շնորհիվ։

Ընդ որում, հենց Telegram հավելվածի ներսում t.me հղումները շարունակում են գործել։ Անխափան աշխատում են նաև telegram.me և telegram.org հասցեները։

Telegram-ի ղեկավարությունը դեռևս պաշտոնապես չի մեկնաբանել ստեղծված իրավիճակը։ Մասնագիտացված աղբյուրների փոխանցմամբ՝ նման խնդիրներ կարող են առաջանալ իրավական վեճերի, իրավապահ մարմինների պահանջների, տեխնիկական ստուգումների կամ այլ տեխնիկական պատճառների հետևանքով։ Նշվում է նաև, որ t.me դոմենը շարունակում է մնալ Telegram-ի սեփականությունը, իսկ դրա գրանցման ժամկետը գործում է մինչև 2035 թվականի մայիս։