Ռուսաստանում ուժգին երկրաշարժ է գրանցվել
Կամչատկայի հարավ-արևելյան ափին տեղի է ունեցել 6.2 մագնիտուդով երկրաշարժ, որի հետևանքով մինչև 4 մագնիտուդ ուժգնությամբ ցնցումները զգացվել են բնակեցված տարածքներում։ Այս մասին հայտնում է Ռուսաստանի գիտությունների ակադեմիայի միասնական երկրաֆիզիկական ծառայության դաշնային հետազոտական կենտրոնի Կամչատկայի մասնաճյուղը։
Երկրաֆիզիկոսների տվյալներով՝ երկրաշարժը գրանցվել է Խաղաղ օվկիանոսում՝ հյուսիսային լայնության 52.1475° և արևելյան երկայնության 160.3095° կոորդինատներում, Պետրոպավլովսկ-Կամչատկայից մոտ 154 կիլոմետր հեռավորության վրա։ Օջախի խորությունը կազմել է 22.3 կիլոմետր։
Նախնական տվյալներով՝ զոհեր և ավերածություններ չկան, սակայն մասնագետները շարունակում են մոնիթորինգը՝ գնահատելու հնարավոր հետցնցումների վտանգը։
