Ադրբեջանի պատվիրակությունը չի մասնակցի Երևանում կայանալիք Եվրանեսթի լիագումար նիստին

Ադրբեջանի Միլլի Մեջլիսի պատվիրակությունը չի մասնակցի Եվրանեսթի խորհրդարանական վեհաժողովի 12-րդ լիագումար նիստին, որը կկայանա հոկտեմբերի 28–30-ը Երևանում։ Այս մասին հայտնել է պատվիրակության ղեկավար Թաիր Միրքիշիլին՝ ընդգծելով, որ որոշումը պայմանավորված է ոչ թե նիստի վայրով, այլ Եվրախորհրդարանի վերջին փաստաթղթերով և հայտարարություններով։ Բաքուն իր որոշումը հիմնավորել է Եվրախորհրդարանի «հակաադրբեջանական» հայտարարություններով և վստահության պակասով:

Միրքիշիլուի խոսքով՝ Եվրախորհրդարանի մի շարք հայտարարություններ հակասում են Ադրբեջանի ինքնիշխանությանը և տարածքային ամբողջականությանը։ «Այդպիսի մոտեցումները չեն նպաստում խաղաղ գործընթացին, այլ աջակցում են այն ուժերին, որոնք շահագրգռված են պահպանել առճակատումը»,- նշել է նա։

Ադրբեջանի խորհրդարանը, ինչպես հայտնել է Միրքիշիլին, մի քանի անգամ դժգոհություն է հայտնել Եվրախորհրդարանի դիրքորոշումից, իսկ Վաշինգտոնում կայացած խաղաղ բանակցություններից հետո արված «ոչ կառուցողական» հայտարարությունները վերջնականապես խաթարել են Բաքվի վստահությունը «Եվրանեսթի» նկատմամբ։

Նա հավելել է, որ որոշումը որևէ կերպ կապված չէ նիստի Երևանում անցկացվելու փաստի հետ։ «Այսօր Ադրբեջանի և Հայաստանի միջև հաստատված է խաղաղություն, և կողմերը ձեռնարկում են գործնական քայլեր հարաբերությունների կարգավորման ուղղությամբ»,– նշել է Միրքիշիլին։