Լարված իրավիճակ Հովհաննավանքում. կարգալույծ եղած Տեր Արամը չի լքում եկեղեցին
Հովհաննավանքում կարգալույծ եղած Ստեփան Ասատրյանը (նախկինում՝ Տեր Արամ) պսակադրություն է իրականացնում։ Եկեղեցու տարածքն էլ ոստիկանները հսկում են, որպեսզի որևէ խնդիր չառաջանա։
Հիշեցնենք, որ նախօրեին Մայր Աթոռը հաղորդագրություն տարածեց, որում նշվել էր, որ տեր Արամ քահանա Ասատրյանը կարգալույծ է արվել։ Վարչապետ Նիկոլ Փաշինյանը հայտարարել է, որ կիրակի գնալու է Հովհաննավանք՝ մասնակցելու Ստեփան Ասատրյանի մատուցած պատարագին։
Մայր Աթոռից MediaHub-ի հետ զրույցում հայտնել են, որ Ստեփան Ասատրյանի անցկացրած պսակադրությունը եկեղեցին անվավեր է համարում։ Եվ ընդհանրապես, անվավեր են բոլոր այն արարողությունները, որոնք իրականացվում են կարգալույծ եղած հոգևորականների կողմից։
«Նշեմ, որ այդ ամենը հակաօրինական է»,- ասել է Մայր Աթոռի տեղեկատվական համակարգի տնօրեն Տեր Եսայի քահանա Արթենյանը։
Այժմ լարված իրավիճակ է Հովհաննավանքում. Ստեփան Ասատրյանը չի լքում եկեղեցին։
