Հայտնաբերվել են էլեկտրաէներգիայի թերգրանցումներ՝ ՀԷՑ-ի Մասիսի ցանցում. Ռոմանոս Պետրոսյան
ՀԷՑ ժամանակավոր կառավարիչ Ռոմանոս Պետրոսյանը ֆեյսբուքյան էջում գրել է, որ ՀԷՑ-ի «Արաքս» մասնաճյուղի Մասիսի էլեկտրական ցանցում հայտնաբերվել է ավելի քան 830 հազար կՎտ/ժամ էլեկտրաէներգիայի թերգրանցում, որը ինքնավար արտադրողները (արևային կայաններ) մատակարարել են ցանցին։
«Այս դեպքում թերգրանցումներն առնչվում են շուրջ 435 սպառող սուբյեկտների (ֆիզիկական և իրավաբանական անձինք), ում ՀԷՑ-ի կողմից դարձյալ պետք է մարվի այս անգամ արդեն ձևավորված 830,055 կՎտ.ժ կուտակումը, ինչը կրկին անխուսափելիորեն ընկերությանը պատճառելու է առանձնապես խոշոր չափերի վնասներ»,–գրել է Պետրոսյանը։
Նա շեշտել է, որ արձանագրված նոր փաստերի առթիվ իր կողմից պատշաճ հաղորդում կներկայացվի Գլխավոր դատախազություն, ինչպես նաև համապատասխան գրություն կհասցեագրվի ՀՀ հանրային ծառայությունները կարգավորող հանձնաժողովի նախագահին։
