Պուտինը հանձնարարական է տվել Ռուսաստանի ԶՈՒ-ին

Այս տարվա հոկտեմբերի 1-ից մինչև դեկտեմբերի 31-ը Ռուսաստանում զինվորական ծառայության կկանչվի 18-ից 30 տարեկան 135 000 մարդ։ Այդ մասին  տեղեկանում ենք «Ինտերֆաքս»  գործակալությունից:

Ըստ հրապարակման՝ ՌԴ նախագահ Վլադիմիր Պուտինը համապատասխան հրամանագիր է ստորագրել 2025 թվականի հոկտեմբեր-դեկտեմբեր ամիսներին քաղաքացիներին զինվորական ծառայության կանչելու և  զորակոչով ծառայություն անցնող քաղաքացիներին արձակելու վերաբերյալ։

«2025 թվականի հոկտեմբերի 1-ից մինչև դեկտեմբերի 31-ը իրականացնել Ռուսաստանի Դաշնության 18-ից 30 տարեկան 135 հազար այն քաղաքացիների զորակոչ, որոնք պահեստազորում չեն և ենթակա են զինվորական ծառայության 1998 թվականի մարտի 28-ի «Զինապարտության և զինվորական ծառայության մասին» թիվ 53- ФЗ Դաշնային օրենքին համապատասխան», - ասվում է փաստաթղթում, որը հրապարակվել է իրավական տեղեկատվության պաշտոնական ինտերնետ հարթակում։

Բացի այդ, հրամանագրին համապատասխան, պետք է իրականացվի զինվորական ծառայությունից այն զինվորների, նավաստիների, սերժանտների և ավագների արձակում, որոնց զինվորական ծառայության ժամկետը լրացել է։