«Զանգեզուրի միջանցք» արտահայտությունն անհարգալից վերաբերմունք է ԱՄՆ նախագահի նկատմամբ․ Սիմոնյան

Մեր ընդդիմադիր գործիչները կամ աշխարհում յուրաքանչյոր ոք, ով ասում է ոչ թե TRIPP-ի մասին կամ Թրամփի ուղի, այլ օգտագործում է միջանցք տերմինը, դա երկու պրոբլեմատիկ իմաստ է իր մեջ պարունակում: Այս մասին Ազգային ժողովում լրագրողների հետ զրույցում ասել է  Ազգային ժողովի նախագահ Ալեն Սիմոնյանը:

«Յուրաքանչյուր մարդ Հայաստանում կամ աշխարհում, ով կասի TRIPP-ին «Զանգեզուրի միջանցք» կամ միջանցք, առաջինը դա անհարգալից վերաբերմունք է ԱՄՆ նախագահի նկատմամբ: Երկրորդը, այդ մարդն իր լեզվամտածողության մեջ չի խոսում խաղաղության մասին, խոսում է պատերազմի իրավիճակում միջանկյալ լուծման մասին»,- ասել է նա:

Նրա խոսքով՝ մինչև տարվա վերջ խաղաղության պայմանագիրը կստորագրվի: 

«Դուք պետք է նկատեք, որ նույնիսկ Ադրբեջանի նախագահի խոսույթն է փոխվել, հոխորտանքներից, վիրավորանքներից, ատելության խոսքից, ինչ-որ չափ այդ խոսակցությունը վերաձևակերպվել է և իրենք էլ են խոսում արդեն խաղաղությունից: Եթե ժամանակին դուք մեզ մեղադրում էիք, ասում էիք՝ ինչի՞ եք մենակ դուք խոսում, ինչի իրենք չեն ասում և այլն, ապա հիմա կարող եք տեսնել, որ իրենք էլ են ասում»,- նշել է Սիմոնյանը։

Դիտարկմանը՝ Ադրբեջանի նախագահն ամբիոնից էլի օկուպանտ է մեզ ասում, նա արձագանքել է․

«Մենք էլ իրենց ենք օկուպանտ ասում, մենք էլ ենք իրենց համար օկուպանտ»,- շեշտել է ԱԺ նախագահը: