2026 թվականին Հայաստանում պաշտպանական ծախսերը կկրճատվեն գրեթե 16%-ով. կառավարությունը հաստատեց բյուջեի նախագիծը

Կառավարության նիստում հաստատվել է «Հայաստանի Հանրապետության 2026 թվականի պետական բյուջեի մասին» օրենքի նախագիծը։

Ֆինանսների նախարար Վահե Հովհաննիսյանը հայտարարել է, որ բյուջեն համահունչ է կառավարության ծրագրի առաջնահերթություններին և ներառում է սոցիալական, կրթական, առողջապահական, տնտեսական և ենթակառուցվածքային կարևոր նախաձեռնություններ։

2026 թվականին Հայաստանում պաշտպանական ծախսերը կկրճատվեն գրեթե 16%-ով:

Կառավարության կայքում հրապարակված պետական ​​բյուջեի նախագծում նշվում է, որ 2026 թվականին պաշտպանության ծախսերը կկազմեն 560 միլիարդ 98 միլիոն դրամ (ՀՀ ԶՈւ ռազմավարական ծավալումն ապահովող մարտական պատրաստականության պահպանում, արտաքին թշնամուց ՀՀ պետական սահմանների պաշտպանության ապահովում):

Պետական ​​բյուջեի նախագծով Պաշտպանության նախարարությանը հատկացվում է 563 միլիարդ 127 միլիոն դրամ։ Նկատենք, որ 2025 թվականին ՀՀ-ն 20%-ով ավելացրել էր ռազմական ծախսերը՝ հասցնելով 664 միլիարդ դրամի։

Հիշեցնենք՝ ՀՀ վարչապետ Նիկոլ Փաշինյանը հայտարարել էր, որ 2026 թվականին պաշտպանական ծախսերի էական աճ չի լինի։

«2026 թվականի պետական ​​բյուջեում պաշտպանական ծախսերի էական աճ չի լինի, կամ ընդհանրապես չի լինի։ Սա տրամաբանական է։ Իհարկե, մենք կշարունակենք օպերատիվ կերպով վերլուծել իրավիճակը», - ասել էր Փաշինյանը։