Շվեդիայի և Հունգարիայի վարչապետների միջև հանրային վեճ է բռնկվել
Սոցիալական ցանցերում Շվեդիայի և Հունգարիայի վարչապետների միջև հանրային վեճ է բռնկվել, երբ Հունգարիայի վարչապետ Վիկտոր Օրբանը գերմանական պարբերականին վկայակոչելով հայտարարել է, որ 280 անչափահաս շվեդուհի ձերբակալվել է սպանության համար։
Շվեդիայի վարչապետ Ուլֆ Քրիստերսոնը հրապարակայնորեն հերքել է իր հունգարացի գործընկեր Վիկտոր Օրբանի X սոցիալական ցանցում հրապարակված հաղորդագրությունն, ըստ որի շվեդական խմբավորումները շահագործում են անչափահաս աղջիկներին և ստիպում մարդասպաններ դառնալ։
Օրբանը տեսանյութ է հրապարակել, որով հղում է կատարում գերմանական Die Welt պարբերականում հրապարակված հաղորդագրությանը, ըստ որի՝ շվեդական խմբավորումները հավաքագրում են դեռահաս աղջիկների՝ բռնի հանցագործություններ, մասնավորապես՝ սպանություն կամ պայթյուներ կատարելու համար։
«Շվեդիայի կառավարությունը մեր գլխին քարոզ է կարդում օրենքի գերակայության մասին։ Մինչդեռ, ըստ Die Welt-ի հոդվածի, հանցավոր խմբավորումները շվեդ երեխաներին օգտագործում են որպես մարդասպաններ՝ գիտակցելով, որ համակարգը նրանց չի դատապարտի։ Երկիրը, որը մի ժամանակ հայտնի էր իր կարգուկանոնով և անվտանգությամբ, այժմ փլուզվում է. սպանության համար ձերբակալվել է ավելի քան 280 անչափահաս աղջիկ, ընտանիքներն ապրում են վախի մեջ։ Շվեդ ժողովուրդը ավելի լավին է արժանի»,- գրել է Օրբանը։
«Դա սուտ է»,- պատասխանել է Ուլֆ Քրիստերսոնը X-ում իր սեփական գրառման մեջ՝ հավելելով. «Զարմանալի չէ, որ դա ասում է մի մարդ, որը ոչնչացնում է օրենքի գերակայությունը իր սեփական երկրում։ Օրբանը հուսահատված է Հունգարիայում կայանալիք ընտրություններից առաջ»։
Ավելի վաղ հայտնել էինք, որ Ֆինլանդիայի նախագահն ու Մեծ Բրիտանիայի նախկին վարչապետը փոխադարձ վիրավորել են միմյանց՝ հրապարակային։
