ԵԹԵ ՀԴՄ կտրոն չունեցող քաղաքացին տուգանվի, կկարողանանք ստվերի դեմ պայքարել. Աղազարյան

Ստվերի դեմ արդյունավետ պայքարը հնարավոր է, մասնավորապես, եթե մենք օրենք ընդունենք, որ երբ քաղաքացին դուրս է գալիս առևտրի կենտրոնից և չունի ՀԴՄ կտրոն, նույնպես տուգանվի։ Այս մասին, այսօր  ԱԺ–ում ՊԵԿ–ի տարեկան զեկույցի լսումների ժամանակ ասել է պատգամավոր Հովիկ Աղազարյանը։

Ըստ նրա՝ մարդիկ ուզում են թաքցնել իրենց եկամուտները, որովհետեւ երբ մի տնտեսվարող տեսնում է, որ իր հարևան մրցակիցը թաքցնում է իր շրջանառությունը, ինքն էլ է թաքցնում և այդ շղթան շարունակական գնում է։

Անդրադառնալով տնտեսությանը, Աղազարյանը նշել է, որ տնտեսության վիճակը նկարագրելու համար ՀՆԱ-ն մի կողմից և ՀՆԱ/հարկեր հարաբերակցությունը մյուս կողմից շատ կարևոր բնութագրիչ են, և ես այն ժամանակ մի հատ հաշվարկ ներկայացրեցի, որ իրականում մեր տնտեսական աճը ոչ թե 5.9% էր, այլ 3.7%։ Ես ասացի, որ ՀՆԱ–ի մեջ մի հավելված էլեմենտ կա, փրփուրի նման, որը ինքը ինքնով արդյունք չի տալիս։

«Հիմա այս տարի էլ ասում են, որ արտաքին առևտրաշրջանառությունը էական անկում է ապրել, էկոնոմիկայի նախարար Գևորգ Պապոյան ասում է՝ դե այդ անկումը պայմանավորված է նրանով, որ անցած տարվա տնտեսության աճի մեջ կար մի հատ էլեմենտ, կարծեմ ոսկու հետ կապված գործառույթները, որ իր մեջ չէր պարունակում էական, այսպես կոչված, սերուցք, և հետևաբար հիմա ընդամենը դա է պակասել, դա մեր համար վնասակար չի»,- ասել է Աղազարյանը:

Աղազարյանը համոզմունք է հայտնել, որ չենք հասնի նախատեսված հարկեր/ՀՆԱ հարաբերակցության 25 տոկոս ցուցանիշին։

«Եվ այդ ժամանակ հետաքրքիր կլինի լսել և՛ էկոնոմիկայի նախարարի պարզաբանումները, և՛ ընդհանրապես ոլորտի պատասխանատուների պարզաբանումները»։