Հնդկաստանի վարչապետը չի մասնակցի ՄԱԿ-ի Գլխավոր ասամբլեայի նստաշրջանին

Հնդկաստանի վարչապետ Նարենդրա Մոդին չի մասնակցի այս ամիս Միացյալ Նահանգներում կայանալիք ՄԱԿ-ի Գլխավոր ասամբլեայի նստաշրջանին։ Այս մասին տեղեկատվություն է հրապարակել «Times of India»-ն։

Հաղորդվում է, որ այս որոշումը կայացվել է Հնդկաստանի և Միացյալ Նահանգների միջև մաքսային սակագների շուրջ լարվածության աճի ֆոնին։

Վարչապետի փոխարեն Հնդկաստանը կներկայացնի արտաքին գործերի նախարար Սուբրամանյամ Ջայշանկարը։

Նշենք, որ ԱՄՆ նախագահ Դոնալդ Թրամփը Դելիի նկատմամբ «պատժիչ» մաքսատուրքեր  էր սահմանել՝ ի պատասխան Հնդկաստանի կողմից Ուկրաինայի պատերազմի ֆոնին Ռուսաստանից նավթ գնելու։

Հավելենք՝ ՄԱԿ-ի Գլխավոր ասամբլեայի 80-րդ նստաշրջանը տեղի կունենա սեպտեմբերի 23-ից 29-ը։