Հակոբ Սիմիդյանն ինքնաբացարկ է ներկայացրել. «Հրապարակ»

Հուլիսին շրջակա միջավայրի նախարարի պաշտոնից ազատված Հակոբ Սիմիդյանը ՔՊ վարչության ընտրություններից հաշված օրեր առաջ ՔՊ վարչության անդամի թեկնածությունից ինքնաբացարկ է ներկայացրել։ Այս մասին հայտնում է «Հրապարակը»:

Ըստ տեղեկությունների նա չի հաղթահարում Նիկոլ Փաշինյանից նեղվածությունը և որոշել է իր վերաբերմունքն այսպես արտահայտել։

Սիմիդյանի հրաժարականը թեպետ վաղուց հասունացած քայլ էր, քանի որ նրա աշխատանքից կառավարությունում բոլորն էին դժգոհ, սակայն վերջին կաթիլը դարձել է այն, որ Գորիսում իշխող ուժի քաղաքական ժողովին նա հանդգնել էր հակաճառել Փաշինյանին, դեմ խոսել վարչության ընտրությունների քարոզչական որոշ կարգերի մասին, ինչն էլ, ասում են, Փաշինյանը չի հանդուրժել եւ երկու օր անց ազատել է նրան։

Թերթի աղբյուրների համաձայն Սիմիդյանն իրականում, որպես այդպիսին, քարոզարշավ էլ չի արել ՔՊ պատվիրակների շրջանում՝ համարելով, որ իր կողմից քննադատված կարգերով քարոզչության մասնակցելը սխալ է։ Թե կոնկրետ ինչից է դժգոհ եղել, հայտնի չէ։

Թերթը փորձել է անձամբ նրանից պարզել, սակայն նա չի ցանկացել խոսել այդ մասին, միայն հաստատել է, որ վարչության անդամի թեկնածությունից ինքնաբացարկ է ներկայացրել։ Արդյոք հեռանո՞ւմ է կուսակցությունից, Սիմիդյանը վստահեցրել է, որ նման բան չի կարող լինել։